Во организација на ИГИ Гостивар и ОЖС Струмица, а како дел од малата акција „Младински активизам за феминизам“ која се спроведува со поддршка од проектот Здружени за активно граѓанство, во Гостивар на 15 ноември 2024 се одржа завршен настан на кој присуствуваа дваесетина млади од Гостивар.
На настанот беа презентирани наодите од анкетата спроведена во општините Струмица и Гостивар. Во анонимната анкета беа опфатени 200 млади девојки и момчиња на возраст од 16 до 25 години во двете општини. Анкетирањето се спроведе во текот на септември годинава, а целта на истражувањето беше да се утврди нивото на вклученост на младите во локалните политики и дали општините при креирањето на програмите и стратегиите подеднакво ги земаат во предвид различните потреби на девојките и момчињата.
Анкетата ги сондираше нивните ставови и перцепции за да се утврди нивото на родово – инклузивни практики во развојот на локалните младински политики и да се идентификуваат нивните различни потреби, интереси и предизвици за унапредување на статусот и улогата на младите во локалните заедници.
Резултатите покажуваат дека младите имаат јасни ставови и идеи за подобрување на инклузивноста и родовата еднаквост. Анкетата спроведена во општините Струмица и Гостивар открива длабоки предизвици во нивното учество во локалните младински политики, oд не вклученост во процесите на одлучување до специфични проблеми на момчињата и девојките. Активноста се реализираше со финансиска поддршка од Европската Унија.
