Младинскиот културен центар од Битола, членка на Форумот за граѓански дијалог (ФГД), на 15 октомври во Крушево, организираше јавна трибина граѓаните и кандидатите за градоначалници во општина Крушево.
На трибината беа присутни тројца од четворицата кандидати, и тоа Зоран Јанески од политичката партија Левица, Томе Христоски од коалицијата за локални избори 2025 година предводена од СДСМ и Нико Чонески од коалицијата „Твоја Македонија“ предводена од ВМРО-ДПМНЕ, кои ги презентираа своите планови и ветувања за развој на Крушево.
Во присуство на 49 граѓани од различни возрасни групи, се разговарашеза најважните локални прашања: инфраструктура и сообраќај, водоснабдување и управување со водата, локален економски развој, млади и младински политики, и подобрување на условите во училиштата. Дискусијата беше содржинска, а на моменти преминуваше во дебата помеѓу кандидатите за нивните излагања.
Кандидатите имаа и несогласувања за моменталните состојби во општина Крушево во однос на фазите на подготовка, сегашна и идна реализација на одредени проекти поврзани со темите/приоритетите кои беа дефинирани за јавната трибина. На пример, такви прашања ба уличната мрежа, отворањето на младинскиот центар, пристапот за развој на индустриската зона (приоритети на интервенција), загубите на вода во водоводниот систем, приоритетни области (населени места) во регионот на Крушево за подобрување на условите во училиштата (основните и средното).
Кандидатите се согласија дека граѓанските приоритети треба да се најдат во листата на проекти и интервенции на идниот градоначалник. Сите присутни кандидати потврдија дека доколку станат градоначалник на Општина Крушево ќе се залагаат за реализација на овие приоритети ќе бидат дел од нивното работење.
Настанот е дел од проектот „Активни граѓани и партиципативна демократија на локално ниво“, спроведуван од НВО Инфоцентар, во партнерство со Младински културен центар – Битола, со поддршка од Меѓународниот центар „Улоф Палме“ од Шведска.
