Во организација на ЗЕУКС Тритон, на 28 ноември 2024 година, во просториите на старата општинска зграда се одржа средба со претставници од општината Маврово и Ростуше, месните заедници од населените места и јавното комунално претпријатие ЈПКД Маврово.
Средбата се одржа во рамките на малата акција „Влијанието и опасностите од зголемениот број на кафеави мечки во Општина Маврово и Ростуше“ на ЗЕУКС Тритон, како дел од проектот „Здружени за активно граѓанство“ на НВО Инфоцентар, поддржан од Европската Унија.
Со идеја да придонесе кон решавање на проблемите и изнаоѓање механизам на контрола и заштита и на населението и на кафеавата мечка, Здружение за екологија и унапредување на културата и спортот „Зеукстритон“ во јули годинава спроведе анкета за ставот на жителите во селата во долнореканскиот крај за кафеавата мечка. Анонимната, полузатворена анкета се проведе во 10 населени места со забележано присуство на кафеави мечки: Жировница, Требиште, Велебрдо, Битуше, Ростуше, Јанче, Аџиевци, Присојница, Скудриње и Врбјане.
На средбата, ЗЕУКС Тритон ги претстави резултатите од анкетата и мислењето на граѓаните за причините, проблемите со кои се сочуваат, како и можните предлози за решенија на овој проблем кој станува се почест и се поголем.
Во широката дискусија, учесниците се согласни дека е неопходна широка дебата со сите релевантни институции, како на локално, така и на национално ниво за да се земат предвид ставовите на сите засегнати страни.
Исто така, учесниците сметаат дека е потребно проширување на испитувањето на јавното мислење на целата територија на Општина Маврово и Ростуше со цел да се има репрезентативен примерок на испитаници.
Изработка на акционен план со конкретни предлози со кои ќе се намали бројот на мечки околу селата е повеќе од потребна. Повеќето од учесниците сметаат дека треба да се покрене иницијатива за референдум за промена на законот за заштита на кафеавата мечка за да се намали бројот на единки до дозволениот број кој што според присутните не би требало да биде повисок од 70-85 единки на територијата на општина и на територијата на Националниот парк Маврово.
Жителите од Маврово и Ростуше сметаат дека е неопходно да се организира прихрана на мечките за да се намали нивното присуство во населените места.
Според учесниците на дискусијата, намалување на бројот на кафеавите мечки со кастрација е процес кој можеби ќе трае многу долг период, но може да даде трајно решение на проблемот. Овие се само дел од предлозите на присутните учесници на дискусијата кои земаа предвид само хумани решенија, наместо крајниот и најнепожелен чекор, отстрел на мечките.
