Во прекрасниот амбиент на Меморијалниот центар „Коџаџик“, познат како Спомен куќа на таткото на Кемал Ататурк во с.Коџаџик во Центар жупа, денеска, 13 октомври 2023, здружението Радика-ДЕ од Дебар и Граѓанската иницијатива на Жени (ГИЖ) од Свети Николе потпишаа меморандум за соработка.
Со потпишувањето на меморандумот Радика-ДЕ и ГИЖ се обврзаа на блиска соработка и го отворија патот за градење партнерства и заедничко промовирање на економското зајакнување на жените од рурални средини.
На средбата се обратија претседателката на Радика-ДЕ, Фадрија Мустафовска, претседателката на огранокот на Радика-ДЕ во Центар Жупа, Бенази Шемовска, Ирина Поцкова , претседателка на ГИЖ, како и Ранкица Божиновска која даде кратко претставување на можностите кои ги нуди Агенцијата за поттикнување на развојот на земјоделството (АПРЗ) и ја претстави организацијата Моја фарма од Гостивар.
На настанот беа изложени и промовирани ракотворби и органски производи од жените претприемачки од Дебар, Центар Жупа, Гостивар и Свети Николе.
Настанот е дел од локалната акција за економско зајакнување на руралните жени „Сличностите не зближуваат“ на здружението Радика-ДЕ која се спроведува во рамките на проектот „Здружени за активно граѓанство“ на НВО Инфоцентар, со поддршка од Европската Унија.
