Денеска, во Europe House Крива Паланка се одржа јавна дебата за важноста на комуникацијата за подобро ментално здравје, во организација на РЦС Спектар.
На дебатата беа презентирани клучните наоди од анализата подготвена врз база на спроведената анкетата во која беа вклучени 20 родители и 21 младинец од Крива Паланка.
Авторот на анализата, Надица Скепаровска Петковска, м-р по клиничка психологија и сертифициран психотерапевт од Европската асоцијација за трансакциска анализа, истакна дека менталното здравје е во се поголем ризик и дека е клучно да се разговара за начините на кои комуникацијата може да помогне во неговото подобрување. Таа препорача дека за менталниот развој на младите најважно е тие да имаат отворена и искрена комуникација со своите родители и наставници.
Учесниците на дебатата развија дискусија за предизвиците со кои се соочува заедницата кога станува збор за менталното здравје на младите и дека е неопходна проактивна меѓусекторска соработка за подобри резултати. Исто така, беше подвлечено дека посебно внимание треба да се посвети на младите со посебни потреби и нивните ментални потреби, како и на посебниот пристап кон момчињата и девојчињата. Јавната дебата„Моќта на комуникацијата за подобро ментално здравје“ е реализирана во рамките на проектот „Здружени за активно граѓанство“, што го спроведува НВО Инфоцентар со финансиска поддршка на Европската Унија.
