На 20 декември 2024 година, Гласен Текстилец ја организираше завршната дебата во рамки на проектот “Активни граѓани за партиципативна демократија на локално ниво”. Настанот се одржа со присуство на граѓани, претставници од месните заедници и важни локални институции.
На дебатата присуствуваа претставници од локалните институции, заменик градоначалникот на Општина Штип, Атанас Крстовски , директорот на Јавното претпријатие “Исар”, Александар Арсовски , и директорот на Јавното претпријатие “Стипион”, Панче Стефановски.
На средбата се разговараше за напредокот и буџетирањето на седумте приоритетни проекти за кои граѓаните се изјаснија во 2022 година, а за кои беше потпишан Меморандум за реализација на граѓанските приоритети меѓу Општина Штип и Гласен Текстилец.
Со овој Меморандум, склучен на 14.12.2022 година, Општина Штип се обврзува дека во периодот 2023 – 2025 година ќе ги реализира следниве граѓански приоритети произлезени од директните консултации со граѓаните:
– Решавање на проблемот со старата водоводна мрежа и притисокот во високите зони.
– Подобра хигиена и управување со отпадот. Подобрување на работата на надлежните јавни претпријатија. Рециклирање на отпадот.
– Доизградба на булеварот „Партизанска“ од АМД до населба Баби.
– Изградба на катни гаражи и повеќе паркинг места во централното градско подрачје.
– Изградба на пречистителна станица за отпадни води.
– Паркови, детски игралишта и униформи за основците.
– Подобрување на општинските услуги на граѓаните.
– Формирање на локален економски социјален совет.
Се расправаше за тековните проекти, роковите за нивно завршување и за проблемите што ги истакнаа претставниците на урбаните заедници, кои се соочуваат со предизвици. Особено внимание беше посветено на новите приоритети и проекти кои треба да се спроведат во 2025.
Настанот се реализираше како дел од коалицијата “Форум за граѓански дијалог”, во рамките на проектот „Активни граѓани и партиципативна демократија на локално ниво“ на НВО Инфоцентар, поддржан од Меѓународниот центар Олоф Палме од Шведска.
