На 22 декември 2023, Гласен Текстилец ја организираше завршната дебата во склоп на проектот “Активни граѓани за партиципативна демократија на локално ниво “ на која се беа присутни граѓани, претставници на месните заедници, како и градоначалникот на Општина Штип, Иван Јорданов, директорот на Јавното претпријатие “Стипион”, Панче Стефановски и директорот на Јавното претпријатие “Исар” , Кирил Зајков.
На оваа средба се разговараше за напредокот и буџетирањето на седумте приоритетни проекти за кои граѓаните се изјаснија во 2022 година, а за кој беше потпишан Меморандум за реализација на граѓанските приоритети меѓу Општина Штип и Гласен Текстилец.
Со овој Меморандум, склучен на 14.12.2022 година, Општина Штип се обврзува дека во периодот 2023 – 2025 година ќе ги реализира следниве граѓански приоритети произлезени од директните консултации со граѓаните:
– Решавање на проблемот со старата водоводна мрежа и притисокот во високите зони.
– Подобра хигиена и управување со отпадот. Подобрување на работата на надлежните јавни претпријатија. Рециклирање на отпадот.
– Доизградба на булеварот „Партизанска“ од АМД до населба Баби.
– Изградба на катни гаражи и повеќе паркинг места во централното градско подрачје.
– Изградба на пречистителна станица за отпадни води.
– Паркови, детски игралишта и униформи за основците.
– Подобрување на општинските услуги на граѓаните.
– Формирање на локален економски социјален совет.
Оваа активност е реализирана како дел од коалицијата Форум за граѓански дијалог, во рамки на проектот на НВО Инфоцентар, поддржан од Меѓународниот центар Олоф Палме од Шведска.
