Мода со повисока свест: Што навистина носиме на себе?
Производството на текстил не е само моден процес, туку еден од најголемите загадувачи на планетата. Еве зошто:
🔹 Висока потрошувачка на вода
За да се произведе само една памучна маица, потребни се околу 2.700 литри вода, што е доволно да ги задоволи потребите на една личност од вода за пиење за најмалку 2,5 години! Потребното количество на вода секако варира во зависност од регионот.
🔹 Загадување на водата и почвата
Процесите на бојадисување и обработка на текстил вклучуваат различни хемикалии кои содржат тешки метали, создавајќи отпадна вода, која во многу земји не се третира. Овие хемикалии преку водата завршуваат во реките и почвата, директно загрозувајќи го водниот свет, безбедноста на земјоделските производи и здравјето на луѓето.
🔹 Емисии на стакленички гасови
Текстилната индустрија учествува со 2 – 8% од глобалните емисии на стакленички гасови (GHG)! Трендот на производство и потрошувачка на текстил и облека продолжува да расте, предизвикувајќи уште поголем раст на емисиите, што директно влијае на климатските промени.
🔹 Синтетички материјали и микро пластика
Материјалите како полиестер и најлон се произведуваат од нафтени деривати од кои, со процесот на преработка, се создаваат стакленички гасови. Овие материјали при перење испуштаат микро пластика, која завршува во морињата и океаните, влијаејќи врз морскиот свет и навлегувајќи во храната што ја јадеме.
🔹Отпад и деградација на почвата
Откако ќе ги фрлиме нашите алишта, тие стануваат отпад и понатаму ја загадуваат и огрдуваат животната средина. Оставени на депониите, преку врнежите синтетичките микро-влакна и токсичните хемикалии користени во производството повторни ги загадуваат подземните води и почвата.
Помалку од половина од употребуваната облека се собира за повторна употреба или рециклирање од која само 1% се рециклира во нова облека, бидејќи технологиите што би овозможиле рециклирање на облеката само што почнуваат да се развиваат.
Акцијата “Мода со повисока свест” ја спроведува Институтот за добро владеење и политики во животната средина и климатските промени – IPECC Скопје, во соработка со НВО Инфоцентар, во рамките на проектот „Здружени за активно граѓанство“, поддржан од Европската Унија.
