НВО Инфоцентар продолжува со реализација на проектот „Родово сензитивно новинарство за локален медиумски плурализам (РЕМ)“, чија цел е зајакнување на капацитетите на локалните и регионалните медиуми за известување за прашања од јавен интерес низ призмата на родовата еднаквост и родово сензитивниот пристап.
Во текот на јуни 2026 година беше реализирана првата фаза од менторската програма, која опфати пет менторски сесии со пет тимови составени од новинарка и граѓанска активистка од различни делови на државава. Во фокусот на менторството беше изборот на теми од јавен интерес кои ќе бидат обработени низ призмата на родовата еднаквост и родово сензитивното известување. Секој од тимовите мапираше прашања и предизвици релевантни за локалните заедници, како основа за подготовка на идните новинарски содржини.
Во рамки на менторските сесии, учесничките добија поддршка во изборот и прецизирање на темите, дефинирање на новинарскиот пристап, идентификување релевантни извори и соговорници, како и насоки за примена на етичките стандарди и принципите на родово сензитивното известување. Посебно внимание беше посветено на обезбедувањето родова перспектива во обработката на темите и нивната релевантност за локалните заедници.
Како дел од проектните активности, беа одржани и дополнителни средби во Куманово, Крива Паланка и Штип, за подготовка на информативно-едукативни сесии наменети за редакциите на локалните медиуми. Средбите беа насочени кон изнаоѓање практични начини за пренесување на знаењата и вештините стекнати за време на обуките за родова еднаквост и родово сензитивно известување. Се разговараше за можните формати на сесиите, тематските приоритети и практичните пристапи за вклучување на новинарите и другите медиумски работници во дискусии за родово сензитивно новинарство, инклузивни практики во известувањето, етички стандарди, разновидност на извори и застапеност на жените и маргинализираните групи во медиумските содржини.
Во следната фаза, тимовите ќе работат на натамошно развивање на избраните теми, собирање информации и подготовка на новинарски содржини, со континуирана менторска поддршка во текот на целиот процес.
Преку комбинирање обуки, менторска поддршка и споделување знаења во редакциите, проектот придонесува за поинклузивно, побалансирано и поодговорно новинарство, како и за зајакнување на локалниот медиумски плурализам и поголема видливост на различните општествени перспективи и искуства во медиумскиот простор.
Овој прилог е изработен во рамки на проектот „Родово сензитивно новинарство за локален медиумски плурализам (РEM)“, спроведуван од НВО Инфоцентар, со поддршка од проектот MEdIA–Lit, спроведуван од Центарот за граѓанско образование од Црна Гора (CCE/CGO), во партнерство со Хелсиншкиот комитет за човекови права во Србија (HCHRS), Хелсиншкиот комитет за човекови права во Северна Македонија (MHC), Тиранскиот центар за новинарска извонредност во Албанија (TCJE) и Атлантската иницијатива во Босна и Херцеговина (AI). Проектот е финансиран од Европската Унија и кофинансиран од Министерството за регионален и инвестициски развој и соработка со невладини организации на Владата на Црна Гора.
