Форумот за граѓански дијалог, преку организациите членки, потпиша Меморандуми за реализација на граѓанските приоритети 2026-2029 со општините Струга, Крива Паланка, Штип, Демир Хисар, Свети Николе и Крушево.
Потпишувањето на меморандумите е завршна активност во процесот на консултации со граѓаните од овие општини за утврдување на локалните приоритети. Со потпишувањето Меморандум, градоначалниците преземаат обврска за реализација на приоритетите произлезени од директните консултации со граѓаните.
Форумот за граѓански дијалог го спроведе консултативниот процес во пресрет и за време на локалните избори 2025 година (септември–октомври), во шесте општини и во него беа вклучени над 1100 граѓани преку неформални средби со различни групи, онлајн анкета, шест јавни консултативни средби со граѓаните во секоја општина, како и шест јавни трибини на кои граѓаните директно разговараа со кандидатите за градоначалници и носители на советнички листи.
Сите активности во рамки на консултативниот процес беа насочени кон три клучни цели:
- Идентификување на најважните локални приоритети според граѓаните;
- Поттикнување на директен и транспарентен дијалог меѓу граѓаните и кандидатите за локална власт;
- Зголемување на веројатноста овие приоритети да бидат интегрирани во програмите и работата на новоизбраните власти.
Средбите опфатија различни групи граѓани – жени од селски средини, млади, постари лица, локални бизниси, припадници на ранливи категории и локални граѓански актвисти. Овој пристап овозможи граѓаните да ги артикулираат проблемите од своето секојдневие: од инфраструктурни предизвици, преку јавни услуги и сообраќај, до прашања поврзани со локалниот развој, квалитетот на живот и поддршката за младите, жените и ранливите категории.
Паралелно, јавните консултативни средби го зацврстија процесот на заедничко разгледување и рангирање на предлозите. Во сите општини доминираа исти или слични потреби: обезбедување чиста вода за пиење, канализација и пречистителни станици; одржливо управување со отпадот; реконструкција на локалната патна инфраструктура, регулирање на сообраќајот и паркинзите; унапредување или воспоставување јавен превоз; подобрување на образовната и спортската инфраструктура; отворање функционални младински центри и др.. Разликите по општини произлегуваат од локалните специфики, на пример, туризмот во Крушево и др. Детален преглед на утврдените приоритети, по општини, ќе најдете во нашиот извештај Форум за граѓански дијалог и Локалните избори 2025: Граѓански приоритети – резултати од консултативниот процес.
Главниот дел од процесот беше затворен со шест јавни трибини, на кои кандидатите за градоначалници ги слушнаа приоритетите утврдени од граѓаните и дадоа свои ставови, предлози и ветувања. Поголемиот број кандидати во секоја општина учествуваа активно, а граѓаните ги искористија трибините да добијат конкретни одговори и објаснувања за изводливоста на предложените приоритети и потреби. Повеќето кандидати изразија подготвеност да ги поддржат граѓанските приоритети, со напомена дека дел од нив ќе зависат од финансиските и административните можности на општините.
Потпишувањето Меморандуми за реализација на граѓанските приоритети 2026-2029 од страна на сега веќе избраните градоначалници го заокружи консултативниот процес.
Форумот за граѓански дијалог (ФГД) е мрежа на граѓански организации координирана од НВО Инфоцентар. Активни членки на мрежата се: Гласен Текстилец – Штип, Младински културен центар – Битола, РЦС Спектар – Крива Паланка, Граѓанска иницијатива на жени – Свети Николе и Центарот на заедницата на Општина Струга. Консултативниот процес на Форумот за граѓански дијалог се реализираше во рамки на проектот: „Активни граѓани и партиципативна демократија на локално ниво“, поддржан од меѓународниот центар „Улоф Палме“ од Шведска.
