Истражувањето „План Б(алкан): Млади за реформи“ ја анализира улогата и значењето на новиот ЕУ План за раст за Западен Балкан врз младите, како и нивната улога во обликувањето на реформските процеси во регионот.
Како што земјите од Западен Балкан се приближуваат кон интеграцијата во Европската Унија, вклучувањето и учеството на младите стануваат клучни за постигнување одржлив раст, социјална кохезија и демократска отпорност.
Планот за раст за Западен Балкан, лансиран од Европската комисија во 2023
година, има за цел да го забрза социо-економското приближување на земјите од Западен Балкан кон ЕУ, преку обезбедување пристап до делови од единствениот пазар и зголемена финансиска поддршка во замена за конкретни реформски обврски.
Младите од Западен Балкан се соочуваат со многу заеднички предизвици: висока невработеност, недостиг на зелени и дигитални вештини, ограничено или речиси непостоечко политичко учество (во зависност од земјата), како и постојан одлив на млади кадар низ Европа и светот. Но истовремено, тие се една од најдинамичните сили на промената во регионот.
Фокусирајќи се на Северна Македонија, Србија и Албанија, ова истражување ги анализира реформските приоритети и финансиските механизми на Планот за раст, и како тие можат да создадат нови можности за младите, да ја зајакнат регионалната соработка и да ја поддржат транзицијата кон инклузивна, иновативна и одржлива економија.
Конечно, План Б(алкан) има за цел да даде придонес во политичките дискусии преку идентификување конкретни препораки за владите, институциите на ЕУ и младинските организации, со цел Планот за раст навистина да им користи на младите, да биде разбирлив за нив и да ја зајакне нивната улога во процесот на интеграција во Европската Унија.
Истражувањето го спроведе неформалната група млади истражувачи од Северна Македонија, Србија и Албанија, наречена GenWB, во рамките на Фондот за активни достигнувања за регионални неформални групи на проектот RYDE.
Прочитајте ја целосната анализа План Б(алкан): Млади за реформи.
Текстот на анализата е достапен и на англиски, српски и албански јазик:
Alb – Plan B(alkan) Youth for Reform
Srb – Plan B(alkan) Youth for Reform
Eng – Plan B(alkan) Youth for Reform
Активноста е поддржана од Фондот за активни достигнувања за регионални неформални групи на тригодишниот регионален проект „Регионален младински дијалог за Европа – RYDE“, финансиран од Европската Унија во периодот од 2023 до 2026 година, преку Програмата на ЕУ за граѓанско општество и медиуми за Западен Балкан и Турција 2021-2023 (ИПА III). Проектот RYDE го спроведува Фондацијата Центар за демократија од Србија како водечки партнер во соработка со партнерските граѓански организации од Западен Балкан: Академија за европски интеграции и преговори и Центар за младинска акција (Албанија), Иницијатива за стабилност на Косово (Косово*), Мрежа на прогресивни иницијативи (Босна и Херцеговина), Фондација НВО Инфоцентар (Северна Македонија) и Регионална академија за демократски развој (Србија).
