И природните и синтетичките ткаенини имаат свој еколошки отпечаток, но влијаат врз природата на различни начини. Еве ја споредбата:
►Памук – Природен, но “жеден”. Производството на памук бара голема потрошувачка на вода. За само една памучна маица, потребни се околу 2.700 литри вода. Сепак, памукот е биоразградлив, се разградува природно со текот на времето. Сепак, традиционалното одгледување памук користи 10 – 16% од светската потрошувачка на средства за заштита на растенијата, што ја уништува почвата и биодиверзитетот.
Памукот е пријатен за кожата. Доколку бираме памук, органскиот памук е подобар избор, бидејќи е произведен без токсични хемикалии и со помала потрошувачка на вода.
►Синтетика (полиестер, најлон и сл.) – Издржлива, но загадувачка. За синтетиката се користи помалку вода при производство. Се произведува од нафта, со што придонесува за емисии на стакленички гасови. Се разградува со векови и испушта микропластика. Една полна машина за перење синтетички материјали може да ослободи 700.000 микро-влакна кои завршуваат во водите. И рециклираниот полиестер (rPET) продoлжува да испушта микропластика.
Која ткаенина е поодржлив избор?
Нема совршена ткаенина, но органскиот памук има помал еколошки отпечаток доколку е одгледан одговорно.
Како да направиш подобар избор?
– Купувај помалку облека, купувај свесно.
– Избирај материјали од 100% органски памук.
– Пери ја синтетичка облека во машина со филтер за микро-влакна*.
*Микро-влакната не можат да се рециклираат заедно со други предмети, како пластика и алуминиум. Сепак, некои компании работат на решение за нивно рециклирање или пренамена. Како моментално решение се препорачува нивното отстранување во затворен, не рециклирачки сад намалувајќи го ризикот од нивно завршување во водата.
Акцијата“Мода со повисока свест” ја спроведува Институтот за добро владеење и политики во животната средина и климатските промени – IPECC Скопје, во соработка со НВО Инфоцентар, во рамките на проектот „Здружени за активно граѓанство“, поддржан од Европската Унија.
