Локални инспекциски служби во интерес на граѓаните

Остваривме успешна соработка со речиси сите локални инспекциски служби во сите осум плански региони во државава, како и со Инспекцискиот совет на РСМ. Локалните инспектори покажаа несекојдневен интерес и проактивност за учество на едукативните работилници во рамки на акцијата. На 16-те работилници активно учествуваа 186 локални инспектори од 46 општини од сите осум плански региони. 

За успешноста на акцијата говори и податокот дека дури 96 инспектори учествуваа во онлајн анкетата посветена на искуството на локалните инспекциски служби при споредувањето на новиот Закон за инспекциски надзор. На завршната јавна дебата, пак, присуствуваа 97 локални инспектори, како и претставници од Државната комисија за одлучување во втор степен во областа на инспекцискиот надзор и прекршочните постапки, претставници од ИС на РСМ, од Државниот инспекторат за локална самоуправа, од Државниот инспекторат за земјоделство, од ДКСК. 

Одржавме девет инфо-средби со локални инспектори, насловени „Запознај го својот инспектор“, на кои учествуваа 155 граѓани, претставници од локални граѓански организации и претставници од општините. 

Во рамки на проектот беше подготвена анализа на спроведувањето на Законот за инспекциски надзор на локално ниво, од која произлегоа низа препораки за подобрување на постојната законска регулатива, а кои им беа доставени на релевантните институции.